കാസര്കോട്: ലോക പരിസ്ഥിതി ദിനാചരണത്തിന്റെ ഭാഗമായി ആസ്റ്റര് മിംസ് ഹോസ്പിറ്റല് കാസര്കോടിന്റെ നേതൃത്വത്തില് ആശുപത്രി ജീവനക്കാര്ക്കും സന്ദര്ശകര്ക്കുമായി 1,000 ഫലവൃക്ഷഔഷധത്തൈകള് വിതരണം ചെയ്തു. ആസ്റ്റര് വോളന്റിയേഴ്സിന്റെയും ‘ബെറ്റര് ലൈഫ്’ എന്.ജി.ഒയുടെയും സംയുക്ത സഹകരണത്തോടെയാണ് ഈ മാതൃകാപരമായ ഹരിത സംരംഭം സംഘടിപ്പിച്ചത്. ആശുപത്രി പരിസരത്ത് നടന്ന ചടങ്ങില് ആസ്റ്റര് മിംസ് കാസര്കോട് ചീഫ് ഓപ്പറേറ്റിംഗ് ഓഫീസര് സുധീര് ബാസുരി തൈകളുടെ വിതരണോദ്ഘാടനം നിര്വ്വഹിച്ചു.
പ്രകൃതിസംരക്ഷണവും പരിസ്ഥിതി സന്തുലിതാവസ്ഥ നിലനിര്ത്തേണ്ടതിന്റെ ആവശ്യകതയും ഓരോരുത്തരുടെയും ഉത്തരവാദിത്തമാണെന്ന് ഉദ്ഘാടന പ്രസംഗത്തില് സുധീര് ബാസുരി ഓര്മ്മിപ്പിച്ചു. ഭാവി തലമുറയ്ക്കായി ഭൂമിയെ നിലനിര്ത്താന് ഇത്തരം ചെറുകിട കൂട്ടായ്മകള്ക്കും നട്ടുപിടിപ്പിക്കലുകള്ക്കും വലിയ പങ്കുണ്ടെന്നും അദ്ദേഹം കൂട്ടിച്ചേര്ത്തു. ആസ്റ്റര് വോളന്റിയര്മാരും ബെറ്റര് ലൈഫ് എന്.ജി.ഒ പ്രവര്ത്തകരും ചേര്ന്ന് ആശുപത്രിയില് എത്തിയ രോഗികള്ക്കും അവരുടെ കൂട്ടായെത്തിയവര്ക്കും ജീവനക്കാര്ക്കും തൈകള് കൈമാറി. പരിസ്ഥിതി ദിന സന്ദേശം ജനങ്ങളിലേക്ക് എത്തിക്കുന്നതിനായി ബോധവല്ക്കരണ പരിപാടികളും ഇതിനോടനുബന്ധിച്ച് നടന്നു. ചടങ്ങില് ആശുപത്രിയിലെ മറ്റ് മുതിര്ന്ന ഉദ്യോഗസ്ഥരും ഡോക്ടര്മാരും സാമൂഹിക പ്രവര്ത്തകരും പങ്കെടുത്തു.