നീലേശ്വരം : പയ്യന്നൂര് മുതല് കോഴിക്കോട് വരെയുള്ള യാത്രക്കാരുടെ നിത്യേനയുള്ള യാത്രാദുരിതങ്ങള്ക്ക് അറുതി വരുത്തേണ്ട റെയില്വേ അധികാരികളുടെ ഭാഗത്തുനിന്ന് ഗുരുതരമായ അനാസ്ഥയാണ് ഉണ്ടാകുന്നത്. ദക്ഷിണ റെയില്വേ പാലക്കാട് ഡിവിഷന്റെ ഏറ്റവും വിലപ്പെട്ട ആസ്തി പണയപ്പെടുത്തി നേടിയെടുത്ത ബെംഗളൂരു – കണ്ണൂര് എക്സ്പ്രസ് കോഴിക്കോട് വരെ നീട്ടിയെങ്കിലും, നിലവിലെ അശാസ്ത്രീയമായ സമയക്രമം കാരണം പയ്യന്നൂര്, നീലേശ്വരം, കണ്ണൂര് തുടങ്ങി കോഴിക്കോട് വരെയുള്ള യാത്രക്കാര്ക്ക് ഇത് വലിയ ഇരുട്ടടിയായി മാറിയിരിക്കുന്നു. പണ്ട് വണ്ടി കണ്ണൂര് വരെ മാത്രമുള്ള സര്വ്വീസായിരുന്നപ്പോള് പാലിച്ചിരുന്ന റണ്ണിങ് സമയത്തിലെ സ്ലാക് ടൈം ഒഴിവാക്കാതെ കോഴിക്കോട് വരെ നീട്ടിയതാണ് ഈ ഗൗരവമേറിയ പ്രതിസന്ധിക്ക് കാരണം.
പയ്യന്നൂര് മുതല് കോഴിക്കോട് വരെയുള്ള വിവിധ സ്റ്റേഷനുകളിലെ യാത്രക്കാര് ഓരോ ദിവസവും കടുത്ത യാത്രാവൈകല്യങ്ങളാണ് അനുഭവിച്ചുകൊണ്ടിരിക്കുന്നത്. നിലവിലെ സമയക്രമം പരിശോധിച്ചാല് ഇതിലെ കടുത്ത യാത്രാപ്രശ്നങ്ങള് വ്യക്തമാകും. പയ്യന്നൂരില് രാവിലെ 09:11-ന് എത്തുന്ന ട്രെയിന് കണ്ണൂര് കടക്കാന് ഏകദേശം രണ്ട് മണിക്കൂറിലധികം സമയം വേണ്ടിവരുന്നുണ്ട്. ഈ സമയം കൊണ്ട് പയ്യന്നൂരില് ട്രെയിന് ഇറങ്ങി ബസ് മാര്ഗ്ഗം വടകര വരെ എത്തുവാന് സാധിക്കുമെന്നിരിക്കെ, ട്രെയിന് യാത്ര അനന്തമായി നീളുന്നത് യാത്രക്കാരെ കടുത്ത നിരാശയിലാഴ്ത്തിയിട്ടുണ്ട്. കണ്ണൂരില് 09:45-ന് എത്തി കോഴിക്കോടേക്ക് പുറപ്പെടുന്ന രീതിയില് സമയം ക്രമീകരിച്ചാല്, കോഴിക്കോട്ട് 11:00 മണിയോടെ എത്തിച്ചേരാന് സാധിക്കും. സ്ലാക് ടൈം പൂര്ണ്ണമായി ഒഴിവാക്കി സമയം 11:30 അല്ലെങ്കില് 11:40 ആക്കാന് കഴിഞ്ഞാല് മൊത്തത്തിലുള്ള റണ്ണിങ് സമയം ഒരു മണിക്കൂറിലേറെ കുറച്ചുകിട്ടുമെന്നാണ് പ്രധാന വിലയിരുത്തല്. കൂടാതെ, കണ്ണൂരില് രാവിലെ 10:00 മണിക്ക് മുന്പ് ഈ വണ്ടി എത്തുന്നതുവഴി, നിലവിലുള്ള ഏറനാട് എക്സ്പ്രസിലെ രാവിലെ കണ്ണൂര് വരെയുള്ള അമിത തിരക്ക് ഒരു പരിധി വരെ ലഘൂകരിക്കാന് സാധിക്കുമെന്നും ചൂണ്ടിക്കാണിക്കപ്പെടുന്നു.
മടക്കയാത്രയിലും പയ്യന്നൂര് മുതല് കോഴിക്കോട് വരെയുള്ള യാത്രക്കാര് സമാനമായ യാത്രാദുരിതമാണ് നേരിടുന്നത്. മംഗളൂരുവില് നിന്ന് രാത്രി 20:10-ന് പുറപ്പെടേണ്ട ഈ വണ്ടിക്ക്, സമയക്രമപ്രകാരം എന്ജിന് റിവേഴ്സല് ചെയ്യാന് പാകത്തില് 19:50 ആണ് അറൈവല് സമയം നിശ്ചയിച്ചിട്ടുള്ളത്. എന്നാല് വളരെ നേരത്തെ അതായത് ഏകദേശം 19:15-ഓടെ തന്നെ വണ്ടി മംഗളൂരുവില് എത്തിച്ചേരുന്നു. ഇതുമൂലം വെറുതെ ഒരു മണിക്കൂറോളം അവിടെ കാത്തുകിടക്കേണ്ടി വരുന്ന അവസ്ഥയാണുള്ളത്.
ഈ അനാസ്ഥ ഒഴിവാക്കാന് കോഴിക്കോട് നിന്നും പുറപ്പെടുന്ന സമയം വൈകിട്ട് 15:30 എന്നുള്ളത് 16:00 ആക്കി മാറ്റിയാല് മതിയാകും. തുടര്ന്ന് പയ്യന്നൂര്, കണ്ണൂര്, നീലേശ്വരം, കാസര്ഗോഡ് ഭാഗങ്ങളിലേക്ക് കൃത്യസമയത്ത് എത്തുന്ന രീതിയിലും സര്വ്വീസ് പരിഷ്കരിക്കാം. ഇത് ഓഫീസില് നിന്നിറങ്ങുന്ന ഉദ്യോഗസ്ഥര്ക്കും വിദ്യാര്ത്ഥികള്ക്കും വടക്കന് മലയോര-തീരദേശ ഭാഗങ്ങളിലേക്ക് സമാധാനത്തില് ഒരു വണ്ടി ലഭിക്കാന് സഹായകരമാകും. നിലവില് വൈകിട്ട് ആറര വരെ പരശുറാം എക്സ്പ്രസിനായി കാത്തുനില്ക്കേണ്ട ദുരിതം ഇതിലൂടെ പൂര്ണ്ണമായും ഒഴിവാക്കാന് സാധിക്കും.
യാത്രാ സമയം ലാഭിക്കുന്നതിനായി കണ്ണൂരില് 09:45-ന് എത്തിച്ച് കോഴിക്കോട്ടേക്ക് ക്രമീകരിക്കുക വഴി ഒരു മണിക്കൂറിലേറെ റണ്ണിങ് സമയം കുറയ്ക്കാന് സാധിക്കും. രാവിലെ 10 മണിക്ക് മുന്പ് വണ്ടി കണ്ണൂരില് എത്തുമ്പോള് ഏറനാട് എക്സ്പ്രസിലെ തിരക്ക് കാര്യമായി കുറയ്ക്കാന് കഴിയുമെന്നതും ശ്രദ്ധേയമാണ്. കോഴിക്കോടുനിന്നും പുറപ്പെടുന്ന സമയം 16:00 ആക്കി മാറ്റിയാല് മംഗളൂരുവിലെ വെറുതെയുള്ള കാത്തിരിപ്പ് ഒഴിവാക്കാം. കണ്ണൂരില് 17:30-നും കാസര്ഗോഡ് 18:45-നും എത്തുന്ന രീതിയില് മാറ്റിയാല് മലയോര-തീരദേശ മേഖലകളിലെ ഓഫീസര്മാര്ക്കും യാത്രക്കാര്ക്കും പരശുറാമിനെ ആശ്രയിക്കാതെ സമാധാനത്തില് മടക്കം സാധ്യമാകും.
പയ്യന്നൂര്, നീലേശ്വരം, കണ്ണൂര്, കോഴിക്കോട് മേഖലകളിലെ ആയിരക്കണക്കിന് യാത്രക്കാരുടെ നിത്യേനയുള്ള യാത്രാദുരിതത്തിന് അറുതി വരുത്താന് പാലക്കാട് റെയില്വേ ഡിവിഷന് അധികാരികള് ഇനിയെങ്കിലും തയാറാകണമെന്ന് വിവിധ ജനപ്രതിനിധികളും യാത്രാ സംഘടനകളും ആവശ്യപ്പെടുന്നു. കോടികള് ചെലവിട്ട് നടപ്പിലാക്കുന്ന ഇത്തരം എക്സ്റ്റന്ഷന് സര്വ്വീസുകള് ജനങ്ങള്ക്ക് പൂര്ണ്ണ തോതില് പ്രയോജനപ്പെടും വിധം സമയക്രമം പുനര്നിര്മ്മിക്കണമെന്നാണ് ഉയര്ന്നുവരുന്ന പൊതുവികാരം. അല്ലാത്തപക്ഷം ശക്തമായ സമരപരിപാടികളുമായി മുന്നോട്ട് പോകാനാണ് യാത്രാകൂട്ടായ്മകളുടെ തീരുമാനം.