നീലേശ്വരം: ഈ മാസം 25 മുതല്‍ 31 വരെ കോഴിക്കോട് എന്‍ഐടിയില്‍ നടക്കുന്ന അറുപത്തിയെട്ടാമത് സംസ്ഥാന സ്‌കൂള്‍ കായികമേളയുടെ ദീപശിഖാ പ്രയാണം ആരംഭിച്ചു. നിരവധി ദേശീയ കായിക താരങ്ങളെ വളര്‍ത്തിയ ചായ്യോത്ത് സര്‍ക്കാര്‍ ഹയര്‍ സെക്കന്‍ഡറി വിദ്യാലയത്തില്‍ നിന്നാണ് പ്രയാണം തുടങ്ങിയത്. ഗോവിന്ദന്‍ പള്ളിക്കാപ്പില്‍ എംഎല്‍എ ഉദ്ഘാടനം ചെയ്തു. കിനാനൂര്‍-കരിന്തളം ഗ്രാമപ്പഞ്ചായത്ത് അധ്യക്ഷന്‍ എം. രാജന്‍ അധ്യക്ഷത വഹിച്ചു. അന്തര്‍ദേശീയ കായിക പ്രതിഭ കെ.സി. സര്‍വാന്‍ ദീപശിഖ ഏറ്റുവാങ്ങി.
കണ്ണൂര്‍ ജില്ലയിലെ കരിവെള്ളൂര്‍ വരെ ചായ്യോത്ത് സര്‍ക്കാര്‍ ഹയര്‍ സെക്കന്‍ഡറി വിദ്യാലയത്തിലെ കായിക താരങ്ങള്‍ പ്രയാണത്തില്‍ പങ്കെടുക്കുന്നു. ജില്ലയില്‍ നീലേശ്വരം രാജാസ് വിദ്യാലയത്തിലും പിലിക്കോട് സി.കെ.എന്‍. ഹയര്‍ സെക്കന്‍ഡറി വിദ്യാലയത്തിലും സ്വീകരണം നല്‍കും.
ജില്ലാ പഞ്ചായത്ത് സ്ഥിരം സമിതി അധ്യക്ഷന്മാരായ എം. മനു, ഒക്ലാവ് കൃഷ്ണന്‍, ജില്ലാ പഞ്ചായത്ത് അംഗം ഡോ. സറീന സലാം, പരപ്പ ബ്ലോക്ക് പഞ്ചായത്ത് സ്ഥിരം സമിതി അധ്യക്ഷന്‍ പാറക്കോല്‍ രാജന്‍, വാര്‍ഡ് അംഗം ധന്യ, ദേശീയ അധ്യാപക സംഘടന സഹ സെക്രട്ടറി മൊയ്തീന്‍, സമഗ്ര ശിക്ഷാ കേരളം ജില്ലാ പദ്ധതി ഏകോപന ഉദ്യോഗസ്ഥന്‍ ഷൗക്കത്തലി, രക്ഷാകര്‍തൃ-അധ്യാപക സംഘടന അധ്യക്ഷന്‍ പി. മനോഹരന്‍, വിദ്യാലയ നടത്തിപ്പ് സമിതി അധ്യക്ഷന്‍ എ. സത്യന്‍, ഒളിമ്പ്യന്‍ കുഞ്ഞുമോള്‍, മദര്‍ രക്ഷാകര്‍തൃ-അധ്യാപക സംഘടന അധ്യക്ഷ ധന്യ, വിദ്യാഭ്യാസ ഉപജില്ലാ ഉദ്യോഗസ്ഥന്‍ സുരേന്ദ്രന്‍, ജില്ലാ കായിക ഏകോപന ഉദ്യോഗസ്ഥ പ്രീതിമോള്‍, സെക്രട്ടറി ബിജു മാസ്റ്റര്‍ എന്നിവര്‍ സംസാരിച്ചു.
വിദ്യാലയ മേധാവി കെ.പി. സീമ, പ്രധാന അധ്യാപകന്‍ സുനില്‍കുമാര്‍, അധ്യാപക സമിതി സെക്രട്ടറി എന്നിവര്‍ ചടങ്ങില്‍ പങ്കെടുത്തു. പ്രധാന അധ്യാപകന്‍ സ്വാഗതവും അധ്യാപക സമിതി സെക്രട്ടറി നന്ദിയും പറഞ്ഞു.
നീലേശ്വരത്തെ സ്വീകരണ പരിപാടിയില്‍ നഗരസഭാ അധ്യക്ഷന്‍ മുഹമ്മദ് റാഫിയും പിലിക്കോട്ടെ സ്വീകരണത്തില്‍ സന്ദീപ് വാര്യര്‍ എംഎല്‍എയും പങ്കെടുക്കും.