കാഞ്ഞങ്ങാട്: ഹൈന്ദവ വിശ്വാസികള്ക്ക് അതിപുണ്യമായ കര്ക്കിടക മാസത്തിന് നാളെ തുടക്കം. ‘രാമായണ മാസം’ എന്ന പേരിലും അറിയപ്പെടുന്ന കര്ക്കിടകത്തില് ജില്ലയിലെ ക്ഷേത്രങ്ങളിലും വീടുകളിലും നാളെ മുതല് രാമായണ പാരായണത്തിന് തിരിതെളിയും.
മഴയും രോഗവും ഏറുന്ന കര്ക്കിടക മാസം ആത്മീയ ശുദ്ധീകരണത്തിന് കൂടിയാണ്. ‘കര്ക്കിടക മാസ രാമായണ പാരായണം’ കേരളീയ ഹൈന്ദവ കുടുംബങ്ങളിലെ നൂറ്റാണ്ടുകള് പഴക്കമുള്ള ആചാരമാണ്.
എഴുത്തച്ഛന്റെ അധ്യാത്മരാമായണം കിളിപ്പാട്ട് ദിവസവും ഒരു അദ്ധ്യായം വീതം 30 ദിവസം കൊണ്ട് പൂര്ത്തിയാക്കുന്നതാണ് ചടങ്ങ്. മഴക്കാലത്ത് വീടിനകത്ത് ഇരുന്ന് കുടുംബം ഒന്നിച്ച് രാമായണം വായിക്കുന്ന പതിവ് ഇന്നും പല കുടുംബങ്ങളും തെറ്റിക്കാറില്ല. ‘ഒരു മാസം മുഴുവന് രാമായണം കേള്ക്കുമ്പോള് മനസ്സിന് ശാന്തിയും കുടുംബത്തില് ഐക്യവും ഉണ്ടാകും’ എന്നാണ് വിശ്വാസം.
കര്ക്കിടക കഞ്ഞി, ഔഷധ കഞ്ഞി, എണ്ണ തേച്ചുള്ള കുളി എന്നിവയും ഈ മാസത്തെ സവിശേഷതകളാണ്. ജില്ലയിലെ വിവിധ ക്ഷേത്രങ്ങളില് രാമായണ പാരായണത്തോടൊപ്പം രാവിലെയും വൈകുന്നേരവും വിശേഷാല് പൂജകളും വിഷ്ണു പൂജയും നടത്താറുണ്ട്. രാമായണ പ്രശ്നോത്തരി, ക്വിസ് മത്സരങ്ങള്, വിളക്ക് പൂജ, പ്രഭാഷണങ്ങള് എന്നിവയും സംഘടിപ്പിക്കാറുണ്ട്.