കാഞ്ഞങ്ങാട്: സ്വതന്ത്ര കര്ഷക സംഘം സെപ്റ്റംബര് 14, 15 തീയതികളിലായി നടന്ന ദ്വിദിന സംസ്ഥാന എക്സിക്യൂട്ടീവ് ക്യാമ്പിന് ബേക്കല് ബീച്ച് പാര്ക്കില് നടന്ന സമാപന സമ്മേളനത്തോടെ സമാപനമായി. സ്വതന്ത്ര കര്ഷക സംഘം നാഷണല് ജനറല് സെക്രട്ടറി കെ. മുഹമ്മദ് കുട്ടി സമ്മേളനം ഉദ്ഘാടനം ചെയ്തു. കുറുക്കോളി മൊയ്തീന് എം.എല്.എ അധ്യക്ഷത വഹിച്ചു. സി. ടി. അഹമ്മദലി മുഖ്യാതിഥിയായി. കാര്ഷിക മേഖല നേരിടുന്ന വെല്ലുവിളികളെ അതിജീവിച്ച് കൃഷിയെ കൂടുതല് ശക്തവും ലാഭകരവുമായ മേഖലയാക്കി മാറ്റുന്നതിന് കൂട്ടായ ഇടപെടലുകള് ആവശ്യമാണെന്ന് ഉദ്ഘാടന പ്രസംഗത്തില് കെ. മുഹമ്മദ് കുട്ടി പറഞ്ഞു. ഉല്പ്പാദനച്ചെലവിലെ വര്ധനയും കാര്ഷിക ഉല്പ്പന്നങ്ങള്ക്ക് അര്ഹമായ വില ലഭിക്കാത്തതും കര്ഷകരെ പ്രതിസന്ധിയിലാക്കുന്നുണ്ട്. ഈ സാഹചര്യത്തില് കര്ഷകര്ക്ക് ആവശ്യമായ പിന്തുണയും സംരക്ഷണവും ഉറപ്പാക്കുന്നതിനൊപ്പം സര്ക്കാര് പദ്ധതികളുടെയും ആനുകൂല്യങ്ങളുടെയും പ്രയോജനം അര്ഹരായവരിലേക്ക് കാര്യക്ഷമമായി എത്തിക്കണം. കാലാവസ്ഥാ വ്യതിയാനം സൃഷ്ടിക്കുന്ന പുതിയ വെല്ലുവിളികളെ നേരിടാന് ശാസ്ത്രീയവും സുസ്ഥിരവുമായ കൃഷിരീതികള് പ്രോത്സാഹിപ്പിക്കുകയും കാര്ഷിക മേഖലയിലെ പുതിയ സാധ്യതകള് പ്രയോജനപ്പെടുത്തുകയും വേണമെന്നും അദ്ദേഹം പറഞ്ഞു. കളത്തില് അബ്ദുള്ള സ്വാഗതം പറഞ്ഞു. സി. മുഹമ്മദ് കുഞ്ഞി, കെ. ഇ. ബക്കര്, എ. ബി. ഷാഫി, റോഷ്നി ഖാലിദ്, കെ. കെ. അബ്ദുല് റഹ്മാന് മാസ്റ്റര് എന്നിവര് സംസാരിച്ചു. കര്ഷകരുടെ പ്രശ്നങ്ങളും കാര്ഷിക മേഖലയുടെ പുരോഗതിക്കാവശ്യമായ നടപടികളും സംബന്ധിച്ച വിവിധ പ്രമേയങ്ങള് സമ്മേളനത്തില് അവതരിപ്പിച്ചു. കാര്ഷിക ഉല്പ്പാദനച്ചെലവ് കുറയ്ക്കുക, ഉല്പ്പന്നങ്ങള്ക്ക് ന്യായവില ഉറപ്പാക്കുക, കര്ഷക ക്ഷേമ പദ്ധതികള് കൂടുതല് കാര്യക്ഷമമാക്കുക, സര്ക്കാര് ആനുകൂല്യങ്ങള് കര്ഷകരിലേക്ക് സമയബന്ധിതമായി എത്തിക്കുക തുടങ്ങിയ ആവശ്യങ്ങള് പ്രമേയങ്ങളില് ഉന്നയിച്ചു. കാലാവസ്ഥാ വ്യതിയാനത്തെ നേരിടുന്നതിനുള്ള നടപടികള്, ആധുനികവും ശാസ്ത്രീയവുമായ കൃഷിരീതികളുടെ പ്രോത്സാഹനം, പുതിയ കാര്ഷിക സംരംഭങ്ങള്, മൂല്യവര്ധിത ഉല്പ്പന്നങ്ങളുടെ സാധ്യതകള്, വിപണന സൗകര്യങ്ങളുടെ വികസനം എന്നിവയും പ്രമേയങ്ങളില് ഉള്പ്പെടുത്തി. കര്ഷകരുടെ വരുമാനം വര്ധിപ്പിച്ച് കാര്ഷിക മേഖലയെ കൂടുതല് ശക്തിപ്പെടുത്തുന്നതിനുള്ള സമഗ്രമായ ഇടപെടലുകള് ആവശ്യമാണെന്നും സമ്മേളനം ചൂണ്ടിക്കാട്ടി.