നീലേശ്വരം : കാറില് കടത്തിയ എം.ഡി.എം. എയുമായി യുവാവിനെ എക്സൈസ് സംഘം സാഹസികമായി പിടികൂടി. തുരുത്തി കുഴിഞ്ഞടിയിലെ എ.സി. സമീര് (32)നെയാണ് നീലേശ്വരം റെയ്ഞ്ച് ഇന്സ്പെക്ടര് എന്.വൈശാഖും സംഘവും അറസ്റ്റുചെയ്തത്. ഇന്നലെ രാത്രി എക്സൈസ് സംഘത്തെ കണ്ട് ചെറുവത്തൂരിലെ സ്വകാര്യ ആശുപത്രി കോമ്പൗണ്ടിലേക്ക് സമീര് കാര് ഓടിച്ചു കയറ്റിയത്. എന്നാല് എക്സൈസ് സംഘം ഇയാളെ പിന്തുടര്ന്ന് പിടികൂടുകയായിരുന്നു. സംഭവം അറിഞ്ഞതോടെ നാട്ടുകാരും തടിച്ചുകൂടി. എക്സൈസ് സംഘം സമീറിന്റെ സ്വിഫ്റ്റ് കാര് പരിശോധിച്ചപ്പോള് 3.297 ഗ്രാം എം.ഡി.എം എയും കണ്ടെടുത്തു. സമീര് മയക്കുമരുന്ന് കടത്തുന്നുണ്ടെന്ന് നേരത്തെ തന്നെ രഹസ്യ വിവരം ലഭിച്ചതിന്റെ അടിസ്ഥാനത്തില് ഇയാളെ എക്സൈസ് സംഘം നിരീക്ഷിച്ചു വരികയായിരുന്നു. മയക്കുമരുന്ന് പിടികൂടിയ സംഘത്തില് അസി. എക്സൈസ് ഇന്സ്പെക്ടര്മാരായ വി.വി.സന്തോഷ് കുമാര്, പി.രാജന്, പ്രിവന്റീവ് ഓഫീസര് പി.പ്രശാന്ത്, പ്രിവന്റീവ് ഓഫീസര്മാരായ വി.ബാബു, കെ.പ്രദീഷ്, കെ.ദിനൂപ്, വനിത ഓഫീസര് ലീമ സിവില് എക്സൈസ് ഓഫീസര് ഡ്രൈവര് എം.വി. പ്രദീപന് എന്നിവരും ഉണ്ടായിരുന്നു.