പ്രഭാകരന്‍ കാഞ്ഞങ്ങാട്
കാഞ്ഞങ്ങാട് : കന്നഡ സാഹിത്യത്തിനുള്ള വിശിഷ്ട ജ്ഞാനപീഠ പുരസ്‌കാരവും കേന്ദ്ര സാഹിത്യ അക്കാദമി അവാര്‍ഡും നേടിയ കുവെമ്പുവിന്റെ ശ്രീരാമായണ ദര്‍ശനം മഹാകാവ്യ ഇപ്പോള്‍ മലയാളത്തിലേക്ക് വിവര്‍ത്തനം ചെയ്ത് പ്രസിദ്ധീകരണത്തിന് തയ്യാറായി. കാഞ്ഞങ്ങാട് സ്വദേശിയും കണ്ണൂര്‍ സര്‍വകലാശാല ബഹുഭാഷാ പഠനകേന്ദ്രം മേധാവിയും കേന്ദ്ര സാഹിത്യ അക്കാദമി മലയാളം ഉപദേശക അംഗവുമായ ഡോ.എ.എം.ശ്രീധരനാണ് ഈ മഹാകാവ്യത്തിന്റെ മലയാളം വിവര്‍ത്തകന്‍.
വാല്‍മീകി രാമായണത്തിലെ കഥാതന്തുവിനെ ആസ്പദമാക്കിയും സര്‍വോദയ, സമന്വയ തത്വങ്ങള്‍ ഉയര്‍ത്തിപ്പിടിച്ചും രചിക്കപ്പെട്ട ഈ കൃതി, കുവേമ്പുവിന്റെ മാസ്റ്റര്‍പീസ് ആയി പരക്കെ കണക്കാക്കപ്പെടുന്നു. ഇതുവരെ സംസ്‌കൃതം, ഇംഗ്ലീഷ്, ഹിന്ദി ഭാഷകളിലേക്ക് വിവര്‍ത്തനം ചെയ്യപ്പെട്ട ഈ ഇതിഹാസം ഇപ്പോള്‍ മലയാളത്തിലേക്ക് വിവര്‍ത്തനം ചെയ്യപ്പെട്ടിരിക്കുന്നു. ഏകദേശം 650 പേജുള്ള ഈ കൃതി ന്യൂഡല്‍ഹിയിലെ ഇന്‍ഡസ് സ്‌ക്രോള്‍ പബ്ലിക്കേഷന്‍സ് പ്രസിദ്ധീകരിക്കും. 9 മാസം കൊണ്ടാണ് വിവര്‍ത്തനം പൂര്‍ത്തിയാക്കിയത്.വിവര്‍ത്തകന്‍ ഡോ. എ.എന്‍. ശ്രീധരന്‍ ഒരു മലയാളിയാണെങ്കിലും കന്നഡ-തുളു ഭാഷകളോട് അതിയായ ആരാധനയുണ്ട്. 1932 മുതല്‍ ലഭ്യമായ തുളു ഭാഷാ കഥകള്‍ അദ്ദേഹം ശേഖരിച്ച് ‘കഥ കഥികെ’ എന്ന പേരില്‍ മലയാളത്തിലേക്ക് വിവര്‍ത്തനം ചെയ്തിട്ടുണ്ട്, അതിന് അദ്ദേഹത്തിന് 2023 ലെ കേരള സര്‍ക്കാരിന്റെ സാഹിത്യ അക്കാദമി അവാര്‍ഡ് ലഭിച്ചു. സതി കമല, മിത്ത ബയല്‍ യമുനക്ക തുടങ്ങി നിരവധി കൃതികളും അദ്ദേഹം വിവര്‍ത്തനം ചെയ്തിട്ടുണ്ട്. തുളു-മലയാളം നിഘണ്ടു, ബ്യാരി-മലയാളം നിഘണ്ടു. എന്നിവയും രചിച്ചിട്ടുണ്ട്.
കുവെമ്പുവിന്റെ പല കവിതകളും ഖണ്ഡകാവ്യങ്ങളും വായിച്ചപ്പോഴാണ് രാമായണ ദര്‍ശനത്തില്‍ താല്‍പര്യം തോന്നിയത്. അത് വായിച്ചു തുടങ്ങിയതോടെ, അവയുടെ ഉള്ളിലെ പല ആശയങ്ങള്‍ക്കും കാലികപ്രസക്തിയുണ്ടെന്ന് ബോധ്യമായി. ഇന്നത്തെ ആധുനിക സമൂഹത്തിന് വളരെ പ്രസക്തമായ രാമായണ ദര്‍ശനം, ഇന്നത്തെ കാലത്ത് തീര്‍ച്ചയായും വായിച്ചിരിക്കേണ്ട ഒരു കാവ്യമാണ്. ചെയ്ത തെറ്റുകള്‍ക്ക് പശ്ചാത്താപത്തിന്റെ അഗ്‌നിയില്‍ സ്വയം നീറി മനുഷ്യ മാധവനായി മാറിയ മന്ഥരെ, വാലി, രാവണന്‍ തുടങ്ങിയവരുടെ കഥകള്‍ യഥാര്‍ത്ഥത്തില്‍ വീടുകളിലും മനസ്സുകളിലും എത്തണം. കേരളത്തിലെ ജനങ്ങള്‍ നിര്‍ബന്ധമായും രാമായണത്തിന്റെ ഈ പുതിയ രൂപം പരിചയപ്പെടണം . മാനസികവും ശാരീരികവുമായ കൊലപാതകങ്ങളെ ന്യായീകരിക്കുന്ന സമൂഹത്തിന് ഈ കൃതി മാര്‍ഗദര്‍ശകമായിരിക്കുമെന്നും ഡോ. എ.എം ശ്രീധരന്‍ പറഞ്ഞു.